Heb 4 | BNP | STEP | Hosi a Vure i rata a ngava dagi maea, e huriki a tara vona ri gi dili na tanga na nimalo vona. Mona a ngava dagi iea i tabana. I mavonga, si gi mangenge, ma ge ranga ne mua, a Vure ge matai mua mu keri ni dili.

a 4:3 Sng 95:11; Hib 3:11

b 4:4 Vuh 2:2

c 4:5 Sng 95:11

d 4:7 Sng 95:7-8

e 4:8 Vin 31:7; Ios 22:4

f 4:10 Hib 4:4

g 4:12 Epe 6:17; Kap 1:16; 19:13-15

h 4:14 Hib 3:1; 10:23

i 4:16 Hib 10:19

Hebrews 4

E Huriki a Tara na Vure Bara Ri Bole a Nimalo

1 Hosi a Vure i rata a ngava dagi maea, e huriki a tara vona ri gi dili na tanga na nimalo vona. Mona a ngava dagi iea i tabana. I mavonga, si gi mangenge, ma ge ranga ne mua, a Vure ge matai mua mu keri ni dili. 2 Mona si longoa a Velenga Kamumu. Nahea si gi rata manga e huriki a Israel hosi. Ri longoa a Velenga Kamumu na Vure, pali i uka ma i kori ria, a vuhuna i uka ma ri luhoi torea. E huriki ala popote kunana ri luhoi torea.

3 ^aHita e huriki si luhoi torea a ngavana Vure, si dili na nimalo iea. Hosi a Vure i ta maea,

“I madihi a hategu ne ria, lakea a kaba, a ta maea,
‘I muholi hateka, i uka ma ri gi dili na tanga na nimalo nau.’”
I ta mavonga, a vuhuna i lobo ni leho na tahuna i ratarikea pali a malala. 4 ^bNi here na tabeke tara na Nitana Vure, i taki a poloruana parava. I ta maea, “Na poloruana parava a Vure i malo, a vuhuna i vakalobo pali a leho vona.” 5 ^cNi here tabu i maea, “I uka ma ri gi dili na tanga na nimalo nau.”

6 Mona a bakovi a ngatavine takutaku ri dili na nimalo iea. Hosi e huriki i uka ma ri dili na nimalo iea, a vuhuna ri longoa a Velenga Kamumu, pali i uka ma ri longototo. 7 ^dPali a Vure i ru tabua tara parava si gi dili na nimalo vona. A parava iea, ra ngane. E huriki a Israel hosi ri ngalahere na Vure na tabeke i ngeki. Muri na pida i kupo e Davit i herea a ngava, ra si masia pali, ra i maea,

“Mona na tahuna mu longoa a Vure ge taki mua,
nahea mu gu putu ngingi.”
8 ^eHosi, e Iosua bara i habi a nimalo ne huriki a Iuda, a Vure i uka ma ge taki tabua tara parava ge bele muri ma. 9 I mavonga, i tahoka a nimalo ne huriki a tara na Vure. A nimalo iea i manga a Parava Nimalo, 10 ^fa vuhuna e huriki ri dili na nimalo na Vure ri malo na leho ne ria, i manga a hini a Vure i malo na tahuna i vakalobo a leho vona.

11 Si gi toni a bulune hita ni dili na nimalo iea, lakea i uka tara viri ge longotaroa a nita na Vure, ge velu. 12 ^gSi gi toni a bulune hita, a vuhuna a nitana Vure i mahuri, i tahoka a nitora. I vere hateka, i rangi a bainat i vere a tabekena i rua. I dili liu na hatene hita, a hanune hita, i manga a bainat i dili na bobona viri, i pala pida a tuhana viri. I pelekado a niluhoi, a ningaru kapiloho ne hita. 13 I uka tara viri ge kapiloho na Vure. A maki lobo si rata, a maki lobo si luhoi, a Vure i lohoka vona. Muri ma hita lobo bara si pesi na matana, ge nana hita vona a naro lobo si rata.

E Isu Ia a Prister Dagi

14 ^hE Isu, a Tuna Vure, a Prister Dagi ne hita, i sike pali na hunu, i made turana Vure. I mavonga, si gi pesi tata ni luhoi torea. 15 A Prister Dagi ne hita i lohoka vona a maka nitoni hale ni rata virihi hita vona, lakea si boru, a vuhuna ia tara i hataki a maka nitoni lobo nga. Pali i uka ma i boru. I uka ma i rata a naro hale. 16 ⁱI mavonga, si gi lakea tabukoi na Vure. I made na gula hariki vona, i rata kamumu hita. Si gi lakea tabukoi vona, ge dodo hita, ge rata kamumu hita, ge tuhori hita na tahuna si bole a nimava.